تحریک تجدد کا پس منظر
اور اس کی فکری بنیادیں
(پانچویں قسط)

ناطقہ سربہ گریباں ہے اسے کیا کہئے

بہرکیف ! یہ ایک مثال ہے اس اجتہاد کی جو یہ حضرات اسلام کو جدید تقاضوں کے مطابق بنانے کے لئے استعمال فرمارہے تھے،
مولوی چراغ علی صاحب کے علاوہ سید مہدی علی ، مصطفیٰ خان اور صلاح الدین خدا بخش صاحبان بھی اس مہم میں کافی پیش پیش رہے، اور انہوں نے’’ تہذیب الاخلاق ‘‘کی بہر نوع مدد کی ،
ایک طرف تو یہ حضرات اسلام کا اس طرح آپریشن کررہے تھے، مگر ڈر تھا کہ عام مسلمانوں کی مخالفت سے کہیں یہ سلسلہ بند نہ ہوجائے، چنانچہ مغرب کی طرف سے اس عمل پر ان کی خوب بیٹھ ٹھونکی جارہی تھی، پروفیسر ولفریڈ ، سی ۔ اسمتھ بڑے واضح الفاظ میں اعتراف کرتے ہوئے صلاح الدین خدا بخش کے بارے میں لکھتے ہیں:

’’ہم ان کا تذکرہ اس گرمجوشی استقبال کا ذکر کئے بغیر نہیں چھوڑ سکتے جو ان کے افکار کو مغرب کی طرف سے عطا کیا گیا ، اسلام جدید پر لکھنے والے مصنفین ( اور ان سے زیادہ عیسائیت کی تبلیغی مشن) یکے بعد دیگرے ان کو خوش آمدید کہتے رہے، انہوں نے اسے اسلامی تجدد کا حرف آخر قرار دیا ، اس کی آزاد خیالی کی تعریفیں کرکے اسے آسمان تک پہنچادیا، … لیکن اس رویّہ کے ذریہ درحقیقت انہوں نے اپنے اس طبقے کا راز افشا کیا ہے جس سے وہ تعلق رکھتے ہیں ‘‘(۲)

کیا اب بھی یہ بتانے کی ضرورت رہ جاتی ہے کہ یہ سب کچھ ’’درپردہ چشم یار کی شہ پر‘‘ ہورہا تھا ؟

تجدّد کا دوسرادور
اب تک ہم نے جن متجدّدین کا ذکر کیا ہے ، وہ مغربی تہذیب کو قبول کرنے کے جواز میں یہی کہتے آئے کہ اسلام صرف عبادتوں کا نام ہے، دنیا کے دوسرے مسائل میں کوئی تہذیب بھی اختیار کرلی جائے، وہ مزاحمت نہیں کرتا۔
لیکن یہ نظریہ تجدّد کا ابتدائی نظریّہ تھا، اور عام مسلمان اپنے مذہب کی اس قدر تنگ اورمحصور کردینے پر کبھی راضی نہ ہوسکے، عالم اسلام میں ہر جگہ اس نظریہ کی پر زور تردید کی گئی ، اور ہر عام وخاص اسے غلط سمجھنے لگا۔
اس موقعہ پر تجدّد کی تحریک کو ایک زبردست خطرہ لاحق ہوا، اور چند ہی دنوں کے بعد متجددین سمجھ چکے تھے کہ ہم نے اسلام کو اس قدر تنگ کرکے اپنے ہی مقصد کو نقصان پہنچایا ہے اور رائے عامّہ اس کے خلاف ہوتی جارہی ہے، چنانچہ ابھی اس نظریئے کو چلے ہوئے زیادہ عرصہ نہیں گذراتھا ، کہ اسلام کو عبادات ورسوم تک محدود رکھنے کی آواز بند ہوگئی اور اس کے بجائے ایک اور آواز ابھری، اور اس نے پکار پکار کر لوگوں سے کہنا شروع کیا کہ وہ کون احمق ہے جو اسلام کو اس قدر تنگ سمجھتا ہے ؟ اسلام اس قدر محصور ہر گز نہیں ، ہم اسلام کی اس توہین کو برداشت نہیں کرسکتے، اسلام تو ایک بہترین تہذیب وتمدّن کا حامل ہے اور یہ تہذیب وتمدّن بعینہٖ وہ ہے جسے انگریز لے اڑے ہیں ، اگر ہم پچھلے کچھ عرصے سے اسے چھوڑ چکے ہیں تو اس کے یہ معنی ہر گز نہیں کہ یہ تہذیب انگریزوں کی ہوگئی، وہ خالصۃً اسلامی تہذیب ہے، اور ہم اگر ترقی کرنا چاہتے ہیں تو ہمیں اس ’’مغربی تہذیب‘‘ کو اپنانا ہوگا ، جو درحقیقت اسلامی تہذیب ہے۔
ملاحظہ فرمایا آپ نے کہ یہ پینترا کس خوبصورتی سے بدلاگیا ؟ بات وہی رہی کہ مغربی تہذیب کو رواج دو، مگر کتنے حسین پیرائے میں کہ ع

رند کے رند رہے، ہاتھ سے جنت نہ گئی

چنانچہ ۱۸۹۱ء میں جناب امیر علی صاحب نے Spirit Of Islam کے نام سے ایک کتاب لکھی ، جس میں نتائج کے اعتبار سے تو وہی نظریات پیش کئے گئے تھے، جو سر سید احمد خان اور مولوی چراغ علی صاحب کے تھے ۔ مگر طریق کار میں اختلاف تھا، ’’پردے‘‘ کے بارے میں اہل مغرب نے یہ اعتراض کیا تھا کہ اسلام نے عورت کو پردے کا پابند بناکر اس کو مقید کردیا ہے، سرسید اور مولوی چراغ علی صاحب نے فرمایا کہ اسلام نے عورت کو پردے کا حکم مشورے کے طور پر دیا ہے ، ورنہ اس کا تعلق تو محض عبادات سے ہے، اور جناب امیر علی صاحب نے ارشاد فرمایا کہ جو یہ کہتا ہے کہ اسلام نے پردے کا حکم دیا ہے ، وہ بھی غلط ، اور جو کہتا ہے کہ پردے کے بارے میں کوئی قانونی حکم نہیں دیا، وہ بھی غلط، درحقیقت وہ اسلام ہی تو تھا جس نے عورت کے اوپر سے اورمظالم کی طرح اس پردے کی قید کو بھی اُٹھایا، اور عورت کو پوری طرح آزادی عطا کی، اسلام کی اس بے نظیری سہولت کو اہل مغرب لے اڑے اور کامیاب ہوئے، اور مسلمانوں نے چھوڑ دیا تو قعرِ مذلّت میں جاگرے۔
غلامی کے بارے میں اہل مغرب کا اعتراض تھا کہ اسلام نے اس کو جائز رکھ کر انسانیت کی توہین کی ہے، سرسیدصاحب نے اس کا جواب دیا کہ اسلام نے صرف عبادات کے بارے میں ہدایات دی ہیں ،حکمرانی کے طریقوں میں ہم خود مختارہیں ، چاہیں قیدیوں کو غلام بنائیں یاچھوڑ دیں، اور جناب امیر علی صاحب نے فرمایا کہ وہ اسلام ہی تو تھا جس نے غلامی کو سختی سے منع کردیا، اسلام کا یہ حکم اہل مغرب نے اپنالیا، اور مسلمان اسے جائز سمجھتے رہے۔
غرض ان تمام مسائل میں ٹیپ کا بند تو یہی رہا کہ مغربی طرزِ حیات اپنایا جائے، مگر پہلے تو یہ کہا جاتا تھا کہ اسلام اس کی راہ میں کوئی رکاوٹ نہیں، اب یہ کہاجانے لگا کہ وہ اس کی ترغیب دیتا ہے، اور یہی اس کے اصلی اصول ہیں۔
امیر علیؔ صاحب کی یہ ماہرانہ تکنیک تجدّد پسند طبقوں میں بیحد مقبول ہوئی ، اور پھر اسی نظرئیے کو بنیاد بناکر مضامین لکھے جانے لگے، اہل مغرب نے بھی اس طریقے کو خوب سراہا مگر ، امیر علی صاحب میں مستشرقین کے نزدیک ایک خامی تھی جس سے انہیں خطرہ لاحق تھا، اور وہ یہ کہ امیر علی صاحب حدیث کو حجت تسلیم کرتے تھے، اور حدیث کو حجت تسلیم کرتے ہوئے مغربی تہذیب کو سوفی صد اسلامی تہذیب کہنا بڑے دل گردے کاکام تھا، اس لئے خطرہ تھا کہ یہ تحریک بھی کہیں جلدی فیل نہ ہوجائے،یہ خطرہ مستشرقین کے دل میں کس بری طرح دھڑک رہا تھا؟ اس کا اندازہ پروفیسر کنٹول اسمتھ کی مندرجہ ذیل عبارت سے ہوگا جو انہوں نے امیر علی صاحب پر تبصرہ کرتے ہوئے لکھی ہے، وہ فرماتے ہیں کہ :
ان لوگوں نے اسلام کو عقلیت پسند ثابت کرنے کے لئے تو قرآن اور حدیث کے طول طویل اقتباسات جی کھول کر پیش کئے، مگر خود قرآن اور حدیث کو عقلیت پسندانہ تنقید کا موضوع کبھی نہیں بنایا،(۳)
مستشرقین کا یہ خطرہ سوفی صد درست نکلا، اور جب یہ بات کچھ چلتی ہوئی نظر نہ آئی تو فوراً ہی تجدّد کی تحریک ایک تیسرے مرحلے میں داخل ہوگئی۔